KidoPath — bolalar uchun interaktiv o‘yinlar
3–7 yoshli bolalar uchun mantiq, matematika, nutq va ijod o‘yinlari — «Ilk qadam» dasturi mavzulari bo‘yicha. Bog‘chada elektron doskada, uyda telefon yoki kompyuterda o‘ynaladi.
Saytga o‘tish →
Quyida: Maxfiylik siyosati ↓
Maxfiylik siyosati
Oxirgi yangilanish: 2026-10-16 · Tahrir: 1.1 (avvalgi tahrir: 2026-10-05)
Operator: “ALICODER” mas’uliyati cheklangan jamiyati
STIR: 312285557
Yuridik manzil: O‘zbekiston Respublikasi, Jizzax viloyati, Zomin tumani, Navbahor MFY, Mustaqillik ko‘chasi, 18-B uy
Aloqa: info@educoin.uz · +998 99 588 88 98
Ilovadan foydalanish shartlari:
kidopath.uz/oferta
EduCoin ilovasi App Store’da “ALICODER” MChJ direktori Islom Baxromovning ishlab chiquvchi akkaunti (“Islomjon Bakhromov”) orqali, Google Play’da esa “Alicoder” nomi bilan joylashtirilgan. Ilova egasi, xizmatni ko‘rsatuvchi va shaxsga doir ma’lumotlar operatori — “ALICODER” MChJ.
Kidopath (EduCoin) — ota-onalar va 5–18 yoshli bolalar uchun kundalik odat va yumushlar ilovasi. Bu sahifa ilova qaysi ma’lumotlarni yig‘ishi, ulardan nima uchun foydalanishi va qanday himoya qilishini tushuntiradi.
1. Qanday ma’lumotlar yig‘iladi
- Ota-ona hisobi: telefon raqami, ism, parol (faqat xesh ko‘rinishida saqlanadi), vaqt mintaqasi va til.
- Farzand profili: ota-ona kiritgan ism, tug‘ilgan yil (ixtiyoriy) va profil rasmi (ixtiyoriy). Bolaning telefon raqami yoki pochtasi so‘ralmaydi — bola ota-ona bergan kod bilan kiradi.
- Ilova ichidagi faoliyat: yumushlar, ularni bajarganini tasdiqlovchi rasm, ovoz yozuvi yoki matn, coinlar, sovg‘alar, o‘yin natijalari va 10 kunlik odat javoblari.
- Texnik ma’lumotlar: kirish seanslari uchun qurilma identifikatori, qurilma modeli, operatsion tizim va ilova versiyasi (qo‘llab-quvvatlash uchun), bildirishnoma (push) tokeni va xavfsizlik (ko‘p urinishlarni cheklash) uchun IP manzil.
- Ilovadan foydalanish: qaysi ekran qachon ochilgani (faqat ekran nomi va vaqti — ekrandagi matn, kiritilgan ma’lumot yoki rasm EMAS) va ilova o‘rnatilganda yasaladigan tasodifiy raqam. Ilovaning qayerida qiynalishayotganini ko‘rib, uni yaxshilash uchun; faqat bizning serverimizda saqlanadi, uchinchi tomonga berilmaydi va 90 kundan keyin o‘chiriladi.
- kidopath.uz saytidagi bepul o‘yin va bepul sinov: hisobsiz bitta o‘yin bepul, ro‘yxatdan o‘tgan yangi hisobga — bepul sinov. Buni bir qurilmadan qayta-qayta olib bo‘lmasligi uchun brauzerda yasaladigan tasodifiy qurilma kodi va IP manzil serverda faqat bir tomonlama kalitli xesh ko‘rinishida saqlanadi (kodning o‘zi va IP manzil yozilmaydi, ulardan odamni aniqlab bo‘lmaydi). Faqat shu maqsadda; uchinchi tomonga berilmaydi va 30 kundan keyin o‘chiriladi.
- kidopath.uz saytidagi o‘yinlar (hisobsiz): saytga kirish, qaysi o‘yin ochilgani va natijasi (ochko), qurilma turi (telefon, planshet, kompyuter), operatsion tizim, brauzer, sayt tili va ekran o‘lchami, hamda brauzerda yasaladigan tasodifiy raqam. Ism, telefon raqami yoki IP manzil yozilmaydi. Saytni va o‘yinlarni yaxshilash uchun; faqat bizning serverimizda saqlanadi, uchinchi tomonga berilmaydi va 1 yildan keyin o‘chiriladi.
- kidopath.uz saytidagi bola hisobi (ixtiyoriy): bola o‘zi yozgan ism, familiya va login, parol (faqat xesh ko‘rinishida), o‘yin natijalari va qaysi topshiriqda adashgani. Bolaning o‘zidan telefon raqami so‘ralmaydi; bog‘cha rahbari bolani qo‘shganda ota-onaning telefon raqamini ixtiyoriy yozishi mumkin — u faqat bog‘cha uchun ma’lumot (kirish va SMS uchun ishlatilmaydi). Natijalarni bola ulangan tarbiyachi ko‘radi (bola uning kodini kiritsa yoki tarbiyachiga ulash kodini bersa). Bog‘chada tarbiyachi doskada o‘ynatgan o‘yin natijasi guruhiga va o‘sha o‘yinda qatnashgan (unga ulangan) bolaga yoziladi; guruhlar o‘rtacha natijasi bo‘yicha solishtiriladi. Saytdagi reytingda (umumiy Top-20 — uni saytga kirgan har kim ko‘radi; bog‘chada — guruh va bog‘cha ichida) bolaning ismi, familiyasi va to‘plagan bali ko‘rsatiladi; reytingda faqat to‘lov qilingan hisoblar chiqadi. Hisobni o‘chirish uchun quyidagi aloqa orqali yozing.
- kidopath.uz saytidagi shashka: eng kuchli raqib — Sherni yutgan o‘yinchining ismi saytda (Sher kartasida) ko‘rsatiladi. Hisobga kirgan bola — ismi va familiyasining bosh harfi; hisobsiz o‘ynagan — o‘zi yozgan ism (yozmasa ham bo‘ladi). Ismni olib tashlash uchun quyidagi aloqa orqali yozing.
- kidopath.uz saytidagi shaxmat: Sherni yutgan o‘yinchining ismi saytda (Sher kartasida) ko‘rsatiladi — faqat hisobga kirgan bola, ismi va familiyasining bosh harfi bilan. Hisobsiz yutgan o‘yinchidan ism so‘ralmaydi: g‘alaba faqat uning brauzerida eslab qolinadi va u ro‘yxatdan o‘tsa yoki kirsa — hisobidagi ism bilan yuboriladi. Ismni olib tashlash uchun quyidagi aloqa orqali yozing.
- To‘lov: tarif, summa va to‘lov holati. Onlayn to‘lov faqat Payme orqali; karta ma’lumotlari bizga KELMAYDI — to‘lov Payme sahifasida amalga oshiriladi.
2. Nima uchun foydalaniladi
- Ilova ishlashi uchun: hisobga kirish, yumush va sovg‘alarni ko‘rsatish, ota-onaga bolaning yuborgan isbotini tasdiqlash imkonini berish.
- Tasdiqlash kodini SMS orqali yuborish (ro‘yxatdan o‘tish va parolni tiklash).
- Premiumni (promokod orqali) va tarbiyachi xizmatini berish, to‘lovni tasdiqlash.
- Xavfsizlik va suiiste’mollikning oldini olish.
3. Reklama, analitika va sotish
- Ilovada reklama YO‘Q. Reklama identifikatori ishlatilmaydi.
- Uchinchi tomon analitika yoki kuzatuv xizmatlari ishlatilmaydi. Istisno: Android’dagi QR skaner (Google ML Kit) Google’ga diagnostika ma’lumotini yuboradi (4-bo‘lim).
- Ma’lumotlar hech kimga SOTILMAYDI va reklama maqsadida berilmaydi.
4. Kimlar bilan ulashiladi
- Payme — to‘lovlar uchun (tarbiyachi xizmati — Ilova ichida; Premium promokodi — “ALICODER” MChJ yuborgan to‘lov havolasi orqali): telefon raqami va buyurtma raqami.
- Aloqabank — Premium promokodi bank o‘tkazmasi orqali to‘langanda (to‘lov “ALICODER” MChJ hisob raqamiga tushadi; bank to‘lovchining rekvizitlarini ko‘radi).
- Eskiz — SMS kod yuborish uchun (faqat telefon raqami).
- Google Firebase Cloud Messaging — bildirishnoma yetkazish uchun (faqat push tokeni va xabar matni).
- Google ML Kit — faqat Android’da, QR kodni o‘qish uchun: QR kod telefonning o‘zida o‘qiladi; Google’ga faqat diagnostika ma’lumoti (qurilma modeli, operatsion tizim va ilova versiyasi, ishlash ko‘rsatkichlari, xatolik kodlari) yuboriladi.
- Bola yuborgan rasm va ovozni faqat shu bolaning ota-onasi ko‘radi. O‘yin reytingida faqat bolaning ismi (familiya qisqartirilgan) ko‘rinadi.
- Tarbiyachi — ota-ona nazoratida: bola ilovada tarbiyachi kodini kiritadi va ota-onaga darhol bildirishnoma boradi. Tasdiq kutilayotganda tarbiyachi faqat bolaning ismini ko‘radi. Ulanish tasdiqlangach (sozlamaga qarab — ota-ona tasdiqlagach yoki kod kiritilishi bilan) tarbiyachi bolaning yoshi, vazifalar ro‘yxati va holati, coin, seriya, 10 kunlik odat va o‘yin natijalarini ko‘radi. Rasm, ovoz va ota-onaning telefon raqami tarbiyachiga BERILMAYDI. Tarbiyachi ilova orqali eslatma yuborishi mumkin (masalan, vazifa qo‘yish yoki so‘rovni tasdiqlash haqida). Bog‘chada: tarbiyachi yoki bog‘cha rahbari bola kodini (ota-ona yoki bola bergan) kiritsa, bola darhol guruhga qo‘shiladi va ota-onaga bildirishnoma boradi; guruhdagi bolaning yuqoridagi ma’lumotlarini guruh tarbiyachilari va bog‘cha rahbari ko‘radi. Ota-ona ulanishni istalgan payt uzadi — shundan keyin tarbiyachi hech narsa ko‘rmaydi.
- Qonun talab qilgan hollarda — vakolatli davlat organlariga.
5. Saqlash va himoya
- Ma’lumotlar himoyalangan serverlarda saqlanadi, ilova bilan server orasidagi aloqa shifrlangan (HTTPS). Shaxsiy ma’lumotlar O‘zbekiston Respublikasi hududidagi serverlarda saqlanadi va qayta ishlanadi. Istisno: bildirishnoma yetkazish uchun push tokeni va xabar matni Google Firebase Cloud Messaging orqali, Android’dagi QR skaner diagnostikasi esa Google ML Kit orqali Google serverlariga uzatiladi.
- Yuklangan rasmlardan joylashuv va qurilma ma’lumotlari (EXIF) o‘chirib tashlanadi.
- Rasm va ovozlar faqat vaqtinchalik imzolangan havola orqali ochiladi.
- Saqlash muddatlari: hisob va farzand ma’lumotlari — hisob o‘chirilguncha; o‘chirilgan hisob — 30 kun (tiklash uchun), keyin butunlay o‘chiriladi (7-bo‘lim); ilovadan foydalanish (ekran) jurnali — 90 kun; to‘lov yozuvlari (summa, sana, tranzaksiya raqami, promokod sotuvida — telefon raqami) — buxgalteriya hisobi uchun, hisob o‘chirilgandan keyin ham saqlanadi.
6. Bolalar maxfiyligi
- Farzand profilini faqat ota-ona yaratadi va boshqaradi. Ota-ona istalgan payt farzand profilini o‘chira oladi.
- Biz bolalardan ota-ona roziligisiz shaxsiy ma’lumot so‘ramaymiz.
7. O‘chirish va sizning huquqlaringiz
- Hisobni Ilovaning o‘zidan o‘chirish mumkin: Sozlamalar → Hisobni o‘chirish. Kirish darhol to‘xtaydi, farzand profillari ham o‘chiriladi. O‘chirilgan hisobni 30 kun ichida qo‘llab-quvvatlash xizmatiga murojaat qilib tiklash mumkin. 30 kundan keyin hisob farzand profillari, ularning rasm va ovozlari bilan birga butunlay o‘chiriladi va tiklanmaydi.
- Ma’lumotlaringizni ko‘rish, tuzatish yoki o‘chirishni so‘rash uchun biz bilan bog‘laning.
8. Bog‘lanish
- Savollar bo‘yicha: info@educoin.uz, +998 99 588 88 98 yoki ilovadagi «Yordam → Yozish» bo‘limi.
- Yuridik manzil: O‘zbekiston Respublikasi, Jizzax viloyati, Zomin tumani, Navbahor MFY, Mustaqillik ko‘chasi, 18-B uy.